Habang pinalalawak ng pambansang pamahalaan ang tulong para sa mga estudyante sa tertiary education, ipinagpapatuloy naman ng Taguig City ang matagal na nitong scholarship programs para mas maraming residente ang magkaroon ng pagkakataong makapag-aral at makatapos.
Noong Setyembre 4, nilagdaan ni Pangulong Ferdinand “Bongbong” Marcos Jr. ang Republic Act No. 12325, na nag-amyenda sa Republic Act No. 10931 o _Universal Access to Quality Tertiary Education Act_.
Sa ilalim ng bagong batas, pinalalawak ang saklaw ng Tertiary Education Subsidy (TES), kabilang ang karagdagang tulong para sa mga estudyanteng mula sa disadvantaged at underserved communities at mga kwalipikadong benepisyaryo ng Pantawid Pamilyang Pilipino Program (4Ps). Pinalalawak din ang mga gastusing pang-edukasyon na maaaring saklawin ng government assistance.
Ngunit bago pa man maisabatas ang RA 10931 at RA 12325, mayroon nang sariling malawak na scholarship program ang Taguig.
Itinatag ng lungsod noong 2011 ang **Lifeline Assistance for Neighbors In-need (LANI) Scholarship Program** sa ilalim ng City Ordinance No. 9, Series of 2011, kasama ang implementing guidelines sa pamamagitan ng Executive Order No. 2011-11.
Pinalawak naman ito noong 2020 sa pamamagitan ng City Ordinance No. 6, Series of 2020 upang mas maraming kwalipikadong residente ang makinabang sa scholarship assistance habang kumukuha ng post-secondary education sa iba’t ibang kolehiyo at unibersidad sa bansa.
Ayon sa lungsod, mahigit **130,000 indibidwal** na ang natulungan ng scholarship program.
Nagbibigay ang Taguig ng iba’t ibang uri ng scholarship assistance, na may halagang umaabot mula **₱15,000 hanggang ₱110,000 kada taon**, depende sa scholarship category. May karagdagang **₱10,000** rin para sa mga scholar na nakapagtala ng semestral weighted average na 88.75 o mas mataas, ayon sa impormasyong nakasaad sa programa.
Hindi lamang grado o kita ng pamilya ang batayan sa scholarship program. May mga espesyal na benepisyo rin para sa mga nagtapos na kabilang sa Top 10 ng mga pampublikong high school sa Taguig at para sa mga nag-aaral sa mga paaralang kinikilala bilang Centers of Excellence.
Kabilang din sa sinusuportahan ang mga estudyanteng persons with disabilities, kumukuha ng graduate studies, at mga nag-aaral ng Law at Medicine sa mga kwalipikadong paaralan.
Naglalaan din ang lungsod ng review assistance para sa mga scholar na naghahanda para sa board at bar examinations.
Bukod dito, ipinatutupad na rin ng Taguig ang **INVEST Scholarship Program**, na naglalaan ng full scholarship at buwanang allowance para sa mga kwalipikadong estudyanteng kumukuha ng Medicine sa piling medical schools.
Iniuugnay rin sa pambansang advocacy para sa edukasyon ang mga hakbang ni Senator Alan Peter Cayetano, kabilang ang mga bersyon ng Iskolar ng Bayan Act, EDCOM III Act, Makakapagtapos Ako Act of 2025 at Learner’s Choice in Private Basic Education Act.
Nag-sponsor din si Cayetano ng panukalang batas para sa priority infrastructure sa public higher education institutions, na co-sponsored ni Senator Pia Cayetano, na nakatuon sa pagpapabuti ng mga pasilidad at learning environment ng mga pampublikong higher education institutions.
Sa patuloy na pagpapatupad ng mga programang ito, binibigyang-diin ng Taguig ang edukasyon bilang mahalagang bahagi ng social development at pagpapabuti ng kalidad ng buhay ng mga residente.
Layunin ng mga scholarship at educational assistance programs na mabawasan ang pinansyal na pasanin sa mga estudyante at mabigyan sila ng mas maraming pagkakataong makapagpatuloy, makapagtapos, at makapaghanda para sa kanilang magiging trabaho at propesyon.
