EPEKTIBO NA NGAYON, SETYEMBRE 26, ANG 60 PISONG DAGDAG-SAHOD PARA SA MGA MINIMUM WAGE EARNER SA NATIONAL CAPITAL REGION.
Ayon kay Department of Labor and Employment Secretary Francis Tolentino, tinatayang 1.1 milyong manggagawa sa Metro Manila ang makikinabang sa pagpapatupad ng Wage Order No. NCR-28.
Sa ilalim ng bagong wage order, mula 695 pesos, magiging 755 pesos kada araw ang minimum wage ng mga manggagawa sa non-agricultural sector sa NCR.
Samantala, para naman sa mga manggagawa sa agriculture, gayundin sa maliliit na retail at service establishments na may 15 manggagawa o mas kaunti, at maliliit na manufacturing establishments na regular na may mas mababa sa 10 empleyado, tataas ang minimum wage mula 658 pesos tungo sa 718 pesos kada araw.
Ayon sa DOLE, bahagi ito ng ipinatutupad na wage adjustment sa NCR matapos dumaan sa tripartite wage-setting process ng Regional Tripartite Wages and Productivity Board-NCR, kasama ang mga kinatawan ng pamahalaan, employers at workers.
Nanawagan naman si Secretary Tolentino sa mga employer na mahigpit na sundin ang bagong minimum wage rates at tiyaking nakaayon dito ang kanilang payroll at compensation systems.
Patuloy din umanong imo-monitor ng DOLE ang pagsunod ng mga kumpanya sa bagong wage order at magbibigay ng gabay sa mga manggagawa at employer kaugnay ng implementasyon nito.
Ang kasalukuyang P60 increase ang unang tranche ng wage adjustment. Batay sa datos ng National Wages and Productivity Commission, may nakatakda pang P25 dagdag-sahod sa Enero 20, 2027, na magtataas sa minimum wage ng non-agricultural workers sa NCR sa P780 kada araw, kapag naipatupad ang susunod na tranche.
Sa kabuuan, aabot sa P85 kada araw ang kabuuang wage increase kapag naipatupad na ang dalawang tranche.
Samantala, nilinaw ng DOLE na ang Wage Order No. NCR-28 ang kasalukuyang nagbibigay ng P60 increase, habang ang naunang Wage Order No. NCR-27 ay nananatiling saklaw ng legal proceedings at hindi pa naipatupad.
Para sa mga manggagawa, nangangahulugan ito ng agarang dagdag sa arawang minimum wage simula ngayong Setyembre 26, habang inaasahang patuloy na susubaybayan ng DOLE ang pagsunod ng mga employer sa bagong itinakdang sahod.
