Nagsanib-puwersa sina National Anti-Poverty Commission (NAPC) Secretary at Lead Convenor Manny Pacquiao at Agriculture Secretary Francisco P. Tiu Laurel Jr. upang higit pang palakasin ang mga pagsisikap ng pamahalaan na maibsan ang kahirapan, partikular sa hanay ng mga magsasaka at mangingisda, na kabilang pa rin sa mga pinakamahinang sektor sa usaping pang-ekonomiya sa bansa.
Nagkita kamakailan ang dalawang miyembro ng Gabinete at tinalakay ang mga paraan upang mapag-ugnay ang mga programa at mapagkukunan ng kanilang mga ahensiya, palawakin ang mga oportunidad sa kabuhayan, pataasin ang produktibidad sa agrikultura, at maihatid ang tulong sa mga komunidad na kulang sa serbisyo at suporta.
Si Pacquiao, na nagmula sa kahirapan ay naging tanyag na pambansang boksingero at nag-iisang kampeon sa buong mundo na nagwagi ng mga titulo sa walong dibisyon, ay nagsabing nasentro ang kanilang talakayan sa paglikha ng pangmatagalang pagkakakitaan para sa mahihirap na pamilya. Kabilang sa mga pangunahing prayoridad ang irigasyon para sa mga magsasaka at suporta para sa mga mangingisda.
“Pinag-usapan namin kung paano kami makapagbibigay ng pangmatagalang kabuhayan sa mga mahihirap, lalo na sa ating mga magsasaka. Isa sa mga napag-usapan namin ang irigasyon,” ani Pacquiao.
Idinagdag niya na magtutulungan ang dalawang ahensiya upang mapakinabangan nang husto ang tulong ng pamahalaan para sa mga komunidad na nangangailangan at matugunan ang mga hamong kinakaharap ng mga umaasa sa agrikultura at pangisdaan para sa kanilang kabuhayan.
Sinabi ni Tiu Laurel na naaayon ang pagtutulungang ito sa direktiba ni Pangulong Ferdinand Marcos Jr. na magtulungan ang mga ahensiya ng pamahalaan sa pamamagitan ng isang komprehensibong pamamaraan ng buong pamahalaan upang matugunan ang kahirapan at iba pang mahahalagang suliranin.
“Masaya kami na bahagi na ng Gabinete si Sec. Manny,” ani Tiu Laurel, at binigyang-diin niya na tututok ang kanilang pagtutulungan sa pagtulong sa mga magsasaka, mangingisda, at mga nag-aalaga ng hayop sa pamamagitan ng pagpapahusay sa paghahatid ng mga programa at tulong ng pamahalaan.
Sa ilalim ng kolaborasyon, tutulong si Pacquiao na ilapit ang mga programa ng Department of Agriculture (DA) sa mahihirap na komunidad, kabilang ang mga urban area, upang matiyak na makararating ang tulong sa mga higit na nangangailangan nito.
Sinabi rin ni Tiu Laurel na sasama si Pacquiao sa kanya sa mga aktibidad sa mga komunidad, kabilang ang pamamahagi ng mga alagang hayop, upang mas maraming opisyal ng Gabinete ang makibahagi sa direktang paghahatid ng tulong ng pamahalaan sa mga mamamayan.
“Sa halip na iisang tao lamang ang umiikot at bumibisita sa mga komunidad, ngayon ay dalawa o tatlo na kaming miyembro ng Gabinete,” ani Tiu Laurel.
Ayon kay Pacquiao, ipinapakita ng inisyatibang ito ang direktiba ng Pangulo na unahin ang mga Pilipinong napag-iiwanan, partikular ang mga walang matatag na kita o pangmatagalang kabuhayan.
Ang pagtutulungang ito at dumating sa panahong patuloy na humaharap sa mga hamong nagbabanta sa kanilang kabuhayan ang mga magsasaka at mangingisda, kabilang ang mataas na gastos sa produksyon, kakulangan sa imprastraktura, at limitadong oportunidad sa ekonomiya. Ang mas mahigpit na koordinasyon sa pagitan ng NAPC at DA ay maaaring makatulong upang maiugnay ang mga pamilya sa mga programang nagbibigay ng tulong sa agrikultura at kabuhayan.
Ang susunod na hakbang ay gawing kongkreto, madaling ma-access, at tuluy-tuloy ang mga napag-usapan upang mapataas ang kita ng mga pamilya at mapatatag ang kanilang seguridad sa ekonomiya.Para kina Pacquiao at Tiu Laurel, layunin ng pagtutulungang ito na gawing mas angkop at tumutugon sa pangangailangan ng mga mahihirap ang tulong ng pamahalaan, habang tinutulungan ang mga magsasaka, mangingisda, at iba pang mahihinang sektor na makapagtayo ng mas matatag at maaasahang kabuhayan.
8Reference: Baby Onquit
