Ikinatuwa ni Education Secretary Sonny Angara ang pag-apruba ng panel sa House of Representatives sa PHP1.952 bilyong dagdag–pondo para sa Department of Education (DepEd) sa ilalim ng panukalang 2027 pambansang badyet.
Inaprubahan ng Budget Amendments Review Subcommittee (BARSc) ng House Committee on Appropriations, sa pamumuno ni Nueva Ecija 1st District Rep. Mikaela Suansing, ang pondo upang ibalik ang suporta sa mga prayoridad na programang nabawasan o hindi nabigyan ng pondo sa PHP975.96 bilyong badyet ng DepEd sa ilalim ng 2027 National Expenditure Program (NEP).
Kabilang sa mga naibalik at naidagdag na pondo ang PHP952 milyon para sa Basic Education Facilities Fund upang magpatayo ng mga silid-aralan, PHP500 milyon para sa School Safety and Security Program, at PHP350 milyon para sa Academic Recovery and Accessible Learning (ARAL) Program.
Ibinalik din ng mga mambabatas ang pondo para sa inclusive education: PHP75 milyon para sa Special Needs Education, PHP50 milyon para sa Madrasah Education, at PHP25 milyon para sa Indigenous Peoples Education.
“We are immensely grateful to our colleagues in the House of Representatives, led by Committee on Appropriations Chairperson Rep. Mikaela Suansing, for stepping up to bridge these vital funding gaps,” pahayag ni Angara. “Every peso added here goes directly to making our public schools safer, our classrooms less congested, and our children better equipped to learn.”
Ang PHP350 milyong dagdag-pondo para sa ARAL Program ay gagamitin upang ipagpatuloy ang tutoring at remediation para sa mga targeted na mag-aaral sa buong bansa. Sa nakalipas na School Year 2025–2026, nakatulong ang mga nakatutok na recovery intervention upang mapababa ang bilang ng mga mag-aaral na nahihirapang magbasa mula 6.7 milyon tungong 2.2 milyon.
“Learning recovery is not a one-year project; it requires continuous, steady momentum,” ani Angara. “Giving the ARAL Program a dedicated allocation ensures that our tutors and teachers have the resources they need to keep pulling our learners forward.”
Binigyang-diin din ni Angara ang kahalagahan ng PHP500 milyong pondo para sa seguridad ng mga kampus kasunod ng mga kamakailang insidente ng banta sa kaligtasan. Kanyang ipinaliwanag na mahalaga ang pagtutulungan ng buong komunidad, na pinagsama ang mas ligtas na pasilidad, mga hakbang sa seguridad, preventive mechanisms, at pakikipag-ugnayan sa mga magulang, lokal na pamahalaan, pulisya, at iba pang katuwang, upang makalikha ng ligtas na kapaligiran sa pag-aaral.
“Our schools must remain safe havens for both our teachers and learners,” sabi ni Angara. “This funding allows us to deploy proper security personnel and protective measures on the ground, giving parents peace of mind whenever they send their kids off to school each morning.”
Kaugnay naman ng PHP952 milyong pondo para sa pagpapatayo ng mga silid-aralan, tiniyak ni Angara na makikipagtulungan ang DepEd sa legislative oversight upang matiyak ang mabilis at transparent na pagpapatupad ng mga proyekto.
“We hear the House loud and clear on the need for accountability and timely implementation. DepEd will make sure that every classroom funded under this budget is constructed on time and built to last,” dagdag ni Angara.
Habang nagpapatuloy ang talakayan sa badyet sa Kamara, nananatiling tiwala ang DepEd na patuloy na bibigyang-prayoridad ng Kongreso ang mga pangangailangan ng mga mag-aaral na Pilipino.
