Muling sinuspinde ng Bureau of Internal Revenue (BIR) ang excise tax sa liquefied petroleum gas (LPG) at kerosene, kasunod ng paglabas ng Executive Order No. 125, series of 2026, ni Pangulong Ferdinand Marcos Jr.
Ayon sa BIR, ipinatutupad ang suspension sa ilalim ng Revenue Memorandum Circular No. 100-2026 na inilabas noong Setyembre 28, 2026.
Batay sa sertipikasyon ng Department of Energy (DOE), umabot sa US$99.41 kada bariles ang isang-buwang average na presyo ng Dubai crude oil, batay sa Mean of Platts Singapore (MOPS), mula Agosto 13 hanggang Setyembre 11. Mas mataas ito sa US$80 kada bariles na threshold na itinakda ng batas.
Sa ilalim ng bagong kautusan:
-
LPG: Ganap na suspendido ang excise tax, maliban kung ginagamit bilang hilaw na materyal sa paggawa ng petrochemical products o bilang fuel para sa motive power.
-
Kerosene: Ganap na suspendido ang excise tax, maliban kung ginagamit bilang aviation fuel.
Awtomatikong babalik ang regular na excise tax rates kapag bumaba sa US$80 kada bariles ang isang-buwang average na presyo ng Dubai crude oil at lumipas ang isang linggo matapos itong sertipikahan ng DOE. Maaari rin itong matapos pagkalipas ng tatlong buwan mula sa pagiging epektibo ng Executive Order, alinman ang mauna.
Nauna nang ipinatupad ng BIR ang kaparehong tax suspension noong Abril 17, 2026 sa ilalim ng EO No. 114. Itinigil ito noong Hulyo 8 matapos bumaba sa ilalim ng US$80 ang average na presyo ng Dubai crude oil.
Ayon sa BIR, bahagi ito ng mga hakbang ng pamahalaan upang magbigay ng pansamantalang tax relief habang nananatiling mataas ang presyo ng langis sa pandaigdigang merkado.
